土耳其兵荒博比利時上盤

魑魅魍魉

03/06/2011
文： 牛奶仔

今晚歐洲國家盃外圍賽A組上演「二哥」之爭，次席嘅比利時會喺主場迎戰少佢哋1分但踢少場嘅土耳其。比利時戰意旺盛，相信可擊敗軍心不穩嘅「作客蟲」土耳其，主隊讓平半抵捧。（有線61及64周六凌晨2:45直播）




A組德國暫時5仗全勝排榜首，「一哥」位置難以動搖，因此其餘各隊都將目標放喺次席，以得到直接出線或參加附加賽嘅資格。現時排第2嘅比利時6戰得10分，比少踢1場嘅土耳其多1分，所以今場即使和波都會喪失主導權。


希丁克傳上「車」損軍心


事實上，比利時近6場4勝2和，攻入15球之多，今場又有隊長華美倫傷愈復出，令防線更完整，仲有應屆法甲最佳球員夏薩特喺前場孭飛，絕對係贏晒地利同人和。




另邊廂，近日頻傳土耳其領隊希丁克將轉投車路士，呢位領隊亦公開暗示會上「車」，對土耳其軍心不無影響，尤其該隊近期作客3連敗，當中更包括輸畀同組弱旅阿塞拜疆，今次造訪「二哥」比利時更難被睇好。