鬥牛幫美國搗亂

港陌

04/06/2011
文： 法比加輝

香港時間周日凌晨，美國將會在主場迎戰世盃冠軍西班牙。由於美國有後顧之憂，三日後就要踢美洲金盃，預期今場熱身賽只會輕舒腳頭，唔會搏命。反觀西班牙領隊迪保斯基今回續遣強陣出征，可見其贏波決心，加輝建議捧客勝。 （周日凌晨４時30分開賽）


「美軍」留力金盃


兩年一度嘅美洲金盃將在周一早上舉行揭幕戰，而主辦國美國就會在周三早上亮相對加拿大，所以距離今場熱身賽，只有三日時間。始終今場都係無關痛癢嘅賽事，預期美國領隊巴特利都唔會為咗場熱身賽而踢殘班兵，美國有保留之下，相信好難守得住「鬥牛幫」。




雖然今場只係熱身賽，但西班牙點兵都算認真，常規正選中就只得佩奧爾及沙維冇份入選，相反其餘主力如一眾剛奪歐聯嘅巴塞兵碧基、布斯基斯及韋拿都會隨隊出征，實力仍屬完整。此外亦召入咗三名較少國家隊經驗嘅新血入伍，保查華利路、般奴蘇利安奴及迪摩奴。




西班牙曾經在兩年前嘅洲際國家盃被美國淘汰出局，令鬥牛幫無法完成大滿貫贏盡歐國盃、世盃及洲際盃，呢個仇點都要報，今場就係最佳時機。