馬其頓做大騷賀主場重開

港陌

04/06/2011
文： 翁文成

歐國盃外圍賽B組賽事，馬其頓會首次喺菲臘二世球場重開後出擊，恭候同組「平頭一哥」愛爾蘭。照牌面睇當然以愛爾蘭秤先，但佢哋後防陷兵荒，馬其頓為保出線希望定必大舉進攻，入球大有2.25倍抵玩。（開賽時間：周日凌晨3:30）


愛爾蘭防線陷兵荒


菲臘二世球場目前擴建到34,600座位，馬其頓足總為慶祝主場重開，今鋪賣大包一律將波飛票價定為2歐元（約22.5港元），吸引大批球迷入場打氣。目前馬其頓喺B組揸住4分排尾二，為保一絲出線希望仲點會踢得保守吖？




今場波喺斯科普里舉行，99年愛爾蘭就係喺呢度畀馬其頓逼和，搞到冇得出席2000年歐國盃決賽周，今次重臨舊地實報仇咁報。適逢馬其頓嘅米特尼斯基同拿沙列夫斯基兩位常規右閘都冇入選，單靠帕爾馬新仔列斯托夫斯基根本嘜唔住愛爾蘭快翼艾登麥基迪。




不過愛爾蘭呢邊亦有老將李察鄧尼停賽，加上辛列特加同施亞蘭奇勒受傷缺陣，大家防線都係咁流，今場入波唔荒少啦！