近屆盤路玄機 分組尾輪最易爆冷

猪拉多纳

05/06/2011


美國、墨西哥係美洲金盃（連改制前）奪標次數最多球隊，分組出線基本上問題不大，睇番近3屆分組賽，兩軍加埋18場比賽只輸過2場，得勝率更超過70%，美國更保持9戰7勝2和不敗佳績，而且7次贏波有6次都能淨勝對手2球或以上，實力明顯超班，而2次和波都係喺最後一輪分組賽出現，即係話美國近3屆頭2輪分組賽都開W，值得留意。




墨西哥上屆於決賽大勝美國5比0，歷史性第8次封王，不過講到分組賽嘅表現，佢哋就遠遠不及美國穩定，除咗上屆曾經喺分組賽打和弱旅巴拿馬，07年更輸過畀洪都拉斯，只能以小組次名出線。過去3屆分組賽，亦只有美國於07年試過以3戰全勝姿態出線，所以去到最後一輪分組賽隨時有冷門賽果，要額外小心嘞！


淘汰階段美國夠穩


去到淘汰賽階段，美國近3屆都能打入決賽，而喺呢3屆共9場嘅淘汰賽中，美國只係喺上屆決賽輸畀過墨西哥，其餘8場於法定時間內取得6勝2和，兩場加時戰亦喺120分鐘內順利解決對手。至於墨西哥就試過喺05年嗰屆8強不敵哥倫比亞出局，上屆準決賽亦要踢至互射12碼至淘汰哥斯達黎加，整體表現較美國遜色。