加拿大唔赦花旗兵

魑魅魍魉

07/06/2011
文： 樂比堅尼

香港時間明早上演美洲金盃兩場Ｃ組賽事，壓軸好戲由東道主美國對加拿大，大家起身後可以望兩眼至返工。美國係四屆金盃冠軍，無論世界排名同名氣都遠勝加拿大，加上主場之利，相信唔少人認為「花旗國」贏硬，但樂比仔覺得加拿大有爆冷潛力，呢場冷敲3.2倍「讓球客勝」。（now 634周三早上8時直播）




時光飛逝，樂比仔對上一次採訪美洲金盃已經係○七年，當時咁啱又係睇美國對加拿大，四年後，美國嘅實力冇乜突破，但加拿大嘅整體水平卻提升咗好多，所以樂比仔預期呢場會係好勢均力敵嘅賽事，美國Ｗ1.28倍完全唔值博。


加國熱身賽表現對辦


首先，加拿大今次徵召嘅人腳，共有十五名球員喺歐洲搵食，其中艾迪巴赫捷臣、施蒙積臣同費恩特都有一定名氣，加上唔少球員喺美職搵食，絕對唔係好似以往咁任人魚肉，淨係睇過去一年嘅熱身賽，贏過白俄羅斯、洪都拉斯，打和烏克蘭同厄瓜多爾，就知道佢哋嘅戰鬥力最少提升咗一個檔次。




此外，加拿大嘅另一優勢係今仗於美國東岸嘅底特律舉行，距離加拿大嘅邊境極近，據講有唔少加拿大球迷都會跨境打氣，相信可大大減低美國嘅主場優勢，而翻查歷史，「美加」大戰對賽往績非常接近，美國贏咗十二次，加拿大贏八次，另外九次打和，可見今場只係五五波！


美國防線老化甩漏多


美國近年欠缺新星上位，打來打去都係靠當路雲、丹普西搵食，呢兩位球星確實係有級數，但防線方面，保卡尼加同安恩胡近年真係退步咗好多，搞到防線好多甩漏，日前熱身賽輸畀西班牙○比四已亮起紅燈，今場隨時畀加拿大偷到雞！