阿塞拜疆+2 3倍「主勝」抵博

魑魅魍魉

07/06/2011
文： 力奇

力奇喺擂台暫時領先，難得有機會喺《是日正菜》出手，梗要搵好嘢同大家分享！3大足球強國今晚分途出擊，小心中伏，尤其係德國喺歐國盃外圍賽A組作客阿塞拜疆呢場波，分分鐘會變和氣生財嘅友誼賽，事關阿塞拜疆領隊福士係德國名宿，坐定粒六出線嘅日耳曼兵對住前輩點會搏盡？德國讓2球太狠，我捧3倍「讓球主勝」。（有線61及64周三凌晨1:00直播）




A組形勢分明，德國6戰全勝排榜首，今晚若然贏波攞3分，至少可以得到小組次席，幾乎係半隻腳踩咗入決賽周，坐定粒六等出線，使唔使大炒先？咪忘記班波傷兵唔少，之前已經有高路斯同小豬等因傷退隊，踢完上輪2:1險勝奧地利後，再有中場路菲斯同基迪拉齊齊證實養傷唔玩，就連門將韋爾斯都話因為老父做手術選擇離隊，領隊勒夫最終要補選兩個小國腳施巴斯坦魯迪同賀治比頂上。


德國傷兵多陣容大執


大軍陣容變變變，力奇都唔見勒夫投訴，皆因佢對出線權可謂成竹在胸。事實上，睇番德國首循環喺主場贏阿塞拜疆6:1，今次輪到作客出擊，有腳風超順嘅馬里奧高美斯壓陣，加上普多斯基又話及時傷愈，本來要贏波係冇乜難度，但咪話力奇小人之心，阿塞拜疆現任領隊福士，其實係德國功勳主帥，96年曾經帶領德國贏歐國盃冠軍，家陣佢帶住阿塞拜疆成績低落，5戰得3分排包尾，日前記者會衰到畀3個記者掟廁紙襲擊，依家最需要嘅梗係同胞嘅「關懷」啦！


阿塞主場贏過土耳其


講真，德國家陣只求贏波，根本毋須求大勝，加上傷兵又唔少，何不做個順水人情，當呢場係友誼賽，求其小勝交差算數呢？咪唔記得，阿塞拜疆今屆分組賽主場曾經贏過土耳其1:0，有地利可以打高啲，今仗輸1粒、甚至乎偷雞搶到分都唔奇，受讓2球，博得過o架！