U21歐國盃A組

魑魅魍魉

11/06/2011


參戰球隊：丹麥U21、瑞士U21、冰島U21、白俄羅斯U21




簡評：丹麥及瑞士普遍被認為出線機會較大，但要留意白俄U21能夠喺附加賽擊敗意大利晉級，冰島亦能力壓德國出線，故呢組出現意外賽果亦絕不出奇。


主場搵食．丹麥


領隊：保甸加特




主將：基斯甸艾歷臣（阿積士）、歷奇尼路臣（維拉利爾）




參賽次數/上屆成績：第4次/外圍賽出局




最佳成績：4強（1992）

簡評：丹麥喺U21歐國盃戰績唔突出，最叻都係92年打過入4強，但今屆以主辦國身份參賽，打入4強相信係最起碼要求，尤其係丹麥擁有阿積士天才中場基斯甸艾歷臣，佢被視為繼勞特立兄弟後丹麥最具潛力球星，另外，維拉利爾前鋒歷奇尼路臣喺U21國家隊累積咗11個入球。

經驗搭夠．瑞士

領隊：譚美

主將：加雲洛域（史浩克04）、梳頓沙基利（巴素利）

參賽次數/上屆成績：第3次/附加賽出局

最佳成績：4強（2002）

簡評：近年積極發展青訓，終於開花結果，繼02同04年後，佢哋再次打入U21決賽周，最為人熟悉球員係史浩克04前鋒加雲洛域、凱沙羅頓中場丹尼爾柏夫奴域同哈化柏林後衞盧斯頓貝加，至於効力巴素利嘅中場梳頓沙基利，更曾於去年代表大國腳踢世界盃，有一定大賽經驗。

默契佔先．冰島

領隊：施維利臣

主將：史基賀臣（阿爾克馬爾）、艾朗根拿臣（高雲地利）

參賽次數/上屆成績：首次參賽/外圍賽出局

最佳成績：∕

簡評：現時嘅冰島U21被譽為黃金一代，當中有15人代表過大國腳，例如前鋒史基賀臣、艾朗根拿臣、比卡比查拿臣都有一定知名度。呢班新星由細夾到大，仲一齊踢埋國家隊，默契方面極佳，絕對係冰島嘅爭勝本錢。另外值得留意嘅係，華迪馬臣係「小球專家」，兼職做埋5人足球國腳。

目標開齋．白俄羅斯

領隊：高特拉迪耶夫

主將：施華哥夫（克拉科夫）、尼卡卓克（巴迪）

參賽次數/上屆成績：第3次/分組賽出局

最佳成績：分組賽（2004、09）

簡評：連續第2屆打入U21歐國盃決賽周，附加賽仲淘汰5屆冠軍意大利。上屆白俄喺分組賽得1和2負，今屆目標係贏番場，超越上屆成績。呢班後生仔最值得留意係中場施華哥夫，佢被形容為「新希比」，兩年前已經被意大利球會卡利亞里收購，上季被外借到波蘭球會克拉科夫。