吾係波牛：哥連泰斯乘機搶W

猪拉多纳

12/06/2011
文： 牛奶仔

今晚巴甲重頭戲由上季冠、季軍對碰，開季未嘗一敗嘅哥連泰斯喺主場迎戰富明尼斯，哥連泰斯質素超班，預料可擊敗有兩名防守主力缺陣嘅富明尼斯，延續對賽佳績，一於捧1.92倍主勝。（開賽時間：周一凌晨3:00）


近3次主場對賽贏晒


上季巴甲季軍哥連泰斯開季兩連勝後，上場作客勁旅法林明高慘被逼和1:1，教練迪迪稱賽果等於輸波，可見佢哋今季爭標嘅決心係幾咁大。梗係啦，哥連泰斯除咗用錢留住上季打江山嗰班老臣子，季前仲簽入星級前鋒阿祖安奴，雖然此子季前受傷需要長抖，不過足證哥連泰斯今季真係捧少隻盃都當輸。




係，哥連泰斯有後衞捷卡奧缺陣，不過咪忘記呢班波除咗主場醒，佢哋對親富明尼斯仲有往績支持！兩軍近8次交手，哥連泰斯竟然錄得4勝4和，近3次主場對賽更全勝，今鋪斷估唔會突然走樣啩。




上季巴甲盟主富明尼斯喺今季開咧戰輸畀聖保羅，其後對住高士路同戈亞尼恩斯先贏波反彈，表現實在欠缺說服力。而且富明今仗有迪根奴同迪加奧兩名中後防主力缺陣，防線天殘地缺，好難頂得住哥連泰斯。