ProfessorK：河床學生隊啞火陷頹細

猪拉多纳

12/06/2011
文： 阿當K神

阿甲秋季聯賽進入倒數階段，正為護級而戰嘅老牌球會河床今晚將作客學生隊，兩軍近期同樣死晒火唔識入波，相信今仗都好難例外，熱捧1.5倍入球細。（廣東體育周一凌晨3:00直播）


兩軍交手例牌開細


阿甲秋進入尾二一輪嘅比賽，由於阿甲係以近3季平均分嚟決定降班球隊，因此位處中游嘅河床家陣仲喺降班漩渦掙扎。不過咪以為有戰意就捧得過，事關河床今季鋒力不濟，踢咗17場聯賽只入得13球，係阿甲入球最少嘅一隊。好在，呢班波雖然攻唔掂，不過都仲守得兩嘴，踢咗咁多場，只係失12球，何況河床今仗仲有防中祖安美亞巴朗踢完國際賽歸隊，防守力自然更靠得住啦。




對家學生隊高不成低不就，大條道理踢風流波，佢哋喺月初場補賽以3:0大勝颶風隊，終止12場不勝嘅頹勢，可惜佢哋之後作客又故態復萌，只能悶和小阿根廷人，可見呢班波真係勁飄忽。事實上，學生隊近12戰有9場食白果，鋒力同河床一樣咁曳，睇埋往績，兩軍近4次交手有3次開入球細，你唔係諗住今戰會一反常態開入球騷啩？