洪禮賢講馬：正能量睇跑馬

猪拉多纳

　　賽事有冇涉及陰謀論？視乎各人睇法。如果同一馬房喺同場派幾駒上陣，熱門嗰匹冇影，或主帥騎嗰匹輸咗，跑出同廐其他馬，甚麼聲東擊西、底出、熱倒冷爆等詞彙，便會「派上用場」，但事實係咪真係咁呢？未必噃！邊有人可以證明到，主帥騎嗰匹馬，一定係該練馬師最為睇好，又或是熱捧嗰匹，實係主力所在。

　　一直唔建議戴有色眼鏡睇賽事（太陽眼鏡除外），如果心態係咁，根本唔好再玩落去。與其好似患上思覺失調，出現輕型精神病表面徵狀，如感覺被迫害、思維障礙、與現實偏離，咁辛苦為乜？不如早日抽身，搵過其他喜好，足球又好，籃球亦得，再唔係就睇賽車，總之一於與賽馬「分手」。

忌扣上陰謀論

　　如果想持續與賽馬談戀愛，第一念係唔好乜都扣上陰謀論一詞。揀唔中頭馬，又或買W跑P，買P跑第四，惟有怪自己眼光不好。當然，如果係騎師跑錯、馬匹際遇，或外來因素影響則作別論。

　　硬要為賽馬活動披上張陰謀論嘅被，雖然未至於超低能、勁搞笑，但心態唔係咁好囉！輸馬係要呻，有權哭馬喪，不過，最好先係檢討問題所在，從而汲取教訓，會比較正能量吧。

馬會賽馬節目主持　洪禮賢