洪禮賢講馬：談談情 跑跑馬

猪拉多纳

　　愛情要維持一段長時間，一定唔容易。愛情搞搞吓會變感情，感情又會經日子「洗刷」，唔覺唔覺變咗責任。

　　有冇結過婚嘅人都好，類似經歷走唔甩，如果未發生過喺閣下身上，可能係前世積福多，先可以避開呢種經歷。又或者自己與另一半係超塵出俗之士，永遠愛火不滅。

　　愛情長跑或短跑，喼住一顆心好重要，心中冇咗團火，做咩都唔起勁，明明想約伴侶燭光晚餐，久而久之，可能會諗：「出去食又貴，返屋企啪碗麵算啦！」而日子耐咗，愛情成分淡化了，可能最終連甚麼生日日期、相識紀念日、結婚周年，統統拋諸腦後，一句講晒……冇心裝載！

日久要調節心態

　　同樣地，要對賽馬提起興趣，長期喼住心中嗰團火，話易唔易，話難又唔難。雖然，我哋唔係娶咗賽馬，或私定終身，冇責任要負，要撇下他投，連一句對唔住都唔使講聲，更加唔會有贍養費要畀！但日子耐咗，如果唔調節心態，可能冇咗當初嘅熱忱，意義會唔同晒。

　　要知道，如果心態唔夠熾熱，與賽馬嘅關係喼唔到愛情嘅狀態，變咗感情或負擔，睇住個排位似誓願，根本享受唔到真正嘅樂趣，所以，對待賽馬嘅心態必需歷久常新。

馬會賽馬節目主持　洪禮賢