遇殘陣漢堡舔舔脷 史特加讓球勝開餐

猪拉多纳

23/09/2011
文： 蘇斯黑柴

德甲獨腳戲史特加主場迎戰漢堡，史特加近期狀態大勇，教頭拉巴迪亞遇上舊主亦格外醒神，幾大都趁漢堡病攞佢命，鬥志加零一。雖然漢堡啱啱炒咗教練，但黑柴認為佢哋有排都未執掂，加上陣容不整，今場作客難捱，推介2.28倍嘅史特加「讓球主勝」。




（有線61及201台周六凌晨2時30分直播）




漢堡上仗主場輸畀慕遜加柏，形勢上全場捱打，雖然今仗變數係炒咗教練奧寧，但喺未有新帥嘅情況下，欠缺經驗嘅助教魯多科卡度素亦幫唔到幾多，最慘係陣容嚴重不整，除咗守將戴克美亞、中場哥高加卡同箭頭荷西古里路養傷外，守將文切尼亦加入傷兵行列，新加盟嘅伊利斯域仍然要停賽，球隊得番十三、四名有經驗嘅球員用，今季加盟但踢落完全唔夠班嘅謝菲布馬都要頂硬上打正選，就算魯多科卡度素想變都冇人畀佢變。


拉巴迪亞遇舊主醒神


史特加近期兩連勝狀態托弗，今季新加盟嘅法蘭斯高洛迪古斯同基斯特令防線比以往更加穩健，前線夏歷、岡崎慎司同卡卡奧近期亦踢得好生猛，何況教練拉巴迪亞過去喺漢堡有過不愉快經歷，所以每對舊主都特別肉緊。上季下半季執教史特加初對舊主，就帶領球隊喺主場大炒漢堡三蛋，現時漢堡情況衰多兩錢重，相反史特加狀態更上一層樓，史特加有權再炒對手一次。