富貴曼城恰死窮維拉

猪拉多纳

15/10/2011
文： 走肖

英超淪為財主玩物，曼城喺主場對阿士東維拉，表面上各有外資撐腰，實情曼城中東老闆文梳亞好似打機咁有無限金錢，維拉美國老細儂拿就縮皮唔願掟錢，仲講明全隊平均周薪要調低1萬鎊，士氣唔插水就奇，就算你話我屈服權貴之下，都要撐曼城1.85倍「讓球主勝」。（有線200及300、廣東體育周六晚10:00直播）


阿古路有傷 迪斯高一樣掂


有錢有咩唔好先？特別係足球世界憎人富貴，等於同自己荷包作對。曼城現時同曼聯同分，聯賽7場有6勝1和，期間贏6場有5次至少淨勝2球，雖然話阿古路同巴洛迪利有傷，估計會錯過呢場聯賽，泰維斯又被內部調查唔使旨意落場，不過451都係領隊文仙尼心水陣式，迪斯高做單箭頭一樣夠殺。




或者你會覺得，曼城跟手要踢歐聯，呢場未必去盡，不過曼城勝在人多，巴利同占士米拿都要為正選位置而戰，阿當莊臣更加要把握機會，否則隨時被踢走，事關曼城最近又放風話，打算強搶阿仙奴隊長尹佩斯、拿玻里前鋒拿維斯、羅馬中場迪羅斯同費倫天拿翼鋒阿里斯奧施斯，唔交功課點爭位？


維拉全體勁減薪士氣曳


上季維拉激走領隊奧尼爾，原因都係一個錢字，老細儂拿閂水喉唔願擴軍，今季佢哋賣走翼鋒達寧同艾舒利楊格，聯賽2勝5和證明搶分能力下降，而且英國報道話，維拉球員嘅平均5.7萬鎊周薪，要大幅削減到4.6萬鎊，拉勻每人每星期唔見13萬港紙，如果咁都有心情踢波，真係要頒個模範員工獎畀佢哋咯。


橫數千軍


曼城主場交手5連勝




‧近5次主場對維拉全勝，連續4次至少淨勝2球。

‧開季11場得1次半場落後，其餘6次領先、4次打和。

維拉9戰全雙

‧開季9場全部開入球雙。

‧近7場有6場開入球細。