馬主論戰

猪拉多纳

朝東飛駒補中

　　高伯新剛啱又憑「金得意」贏馬，睇嚟呢位練馬師的確有料，可以吼吓佢手馬。推介第七場「朝東飛駒」，上場放到臨尾一步先畀「正黃旗」追過，但已證明依家評分有着數，再跑谷草一哩應該可以贏馬補中。

　　另外鍾意第四場「東方駿馬」，上仗跑谷草1000米，輸畀頭馬「綠衣郎」唔夠一個馬位，今次換柏寶執韁兼增程二百米，應該可以將呢隻馬嘅後勁發揮到淋漓盡致，值得捧場。

張敬山

太陽奇妙四班惡

　　剛啱姚本輝憑「翡翠明星」同「正白旗」起孖，搏殺手風好順，今晚一於吼實佢手馬。

　　鍾意第二場「風動寶」，近三戰跨季取得亞季殿各一，證明響四班夠惡，今次轉嚟谷草上陣，係時候贏番場。

　　另外推介第六場「太陽奇妙」，呢隻馬不時同「康駿」互有勝負，後駒今季兩戰全勝，反映呢隻馬響四班同樣有優勢，縮程跑一哩肯定啱佢發揮，要吼實。

任達華

鐳射槍強配搏殺

　　今晚我哋隻「鐳射槍」有份上陣，呢隻馬上場跑田草2000米，末段衝上嚟跑第三，如果唔係早段落後太多，分分鐘更近。今次轉嚟谷草上陣，交畀韋達操刀，希望可以拉番一場頭馬喇！

　　另外推介尾場「按得美麗」，上場初出跑田草1800米已經上名，三歲馬質素肯定唔會曳，今次轉嚟谷草上陣贏卡士，用到巫斯義操刀可開齋。

寇鴻萍、梁廷鏘