銀河搶冠軍送別碧咸

猪拉多纳

20/11/2011
文： 走肖

碧咸「阿美利堅告別戰」聽朝上演，洛杉磯銀河喺美職聯總決賽硬撼侯斯頓戴拿模，讓半一唔過分，事關碧咸登陸美職4年，仲未拎過總冠軍，臨別在即肯定盡情燃燒小宇宙，更何況佢喺美職聯常規賽助攻榜排第2位，7旋斬重現江湖邊個頂得住？（now633及660台周一早上10:00直播）




總決賽喺加州卡森城舉行，亦即係洛杉磯銀河主場，由於英格蘭領隊卡比路講明，唔會預碧咸踢出年歐國盃，聖日耳門球員又反對佢加盟，賽前碧咸自爆，唔排除踢埋今場就掛靴。雖然個人覺得，希望踢埋倫敦奧運嘅碧咸唔會就咁收山，但喺佢心目中，呢場肯定係佢近年最重要戰役，衰咗隨時成世心噏。


銀河教練曾兩奪總冠軍


銀河教練艾連拿帶領過華盛頓聯隊兩奪總冠軍，碧咸＋當路雲＋羅比堅尼踢英超都唔失禮，加上碧咸今季常規賽上陣26場、交出15次助攻創出個人登陸美職聯後兩大新紀錄，除咗入選聯賽最佳11人，仲拎埋最佳復出球員大獎，強勢翻生抵撐。


侯斯頓射手程拜仁走下坡


對家侯斯頓戴拿模有常規賽攻入4球嘅甘韋化因傷缺陣，王牌程拜仁又已經33歲，今季常規賽得番5個入球，表現明顯走下坡，上個月交手侯斯頓能夠贏3:1，好大程度係因為當時銀河已經穩奪常規賽冠軍放鬆晒，今次再遇係另一個故事嘞。


橫數千軍


銀河季後賽戰績勁




‧跨季近6場美職季後賽取得5勝1負。

‧近4場有3次開入球大。

 侯斯頓對賽火力蝕底

‧對上6次對賽有4次冇波入。

‧近7場未曾半場落後，4次領先、3次打和。