漢堡回勇搶「芬」良機

猪拉多纳

20/11/2011
文： 郭球奇

漢堡近期回勇，預計經過國際賽期再調校後，新帥芬克有權喺今晚德甲帶隊主場擊敗賀芬咸開門紅，畢竟對手一班主力踢完太公波變晒「落水狗」，近年交手又佔上風，漢堡讓平半撐上盤！（有線61、64、201及204周一凌晨0:30直播）


漢堡 Vs 賀芬咸


開季沉到爆嘅漢堡，改由前拜仁球員芬克執教後表現明顯好轉，只係略欠運氣，上任帶隊4場正式比賽都打成平手，但上輪德甲作客利華古遜，落後兩球最後都攞番1分，睇得出芬克真係有啲料到，預計經過一個國際賽期後，芬克對麾下球員更加了解，今晚應可取得上任後首場勝利。


馬古斯貝治操到弗晒


事實上，漢堡班球迷都好期待對賀芬咸嘅賽事，早幾日已賣出4.5萬張波飛，預計今晚好大機會爆滿。漢堡雖有射手柏歷打柴，幸另一前鋒馬古斯貝治已經操弗；啱啱首度入選德國U20嘅林志堅，雖然日前因感冒提早退隊，但據講依家已經冇事，仲同球會續約至2015年添，難怪芬克日前接受訪問時，暗示中場查洛林可以喺今季尾離隊，足證佢對漢堡目前嘅班底極之信任。


賀芬咸患國際賽後遺症


已兩場不勝嘅賀芬咸有多位主力要踢太公波，可惜前鋒賴恩巴布同左閘巴菲特代表嘅荷蘭大敗畀德國，代表波斯尼亞嘅伊比斯域又慘敗畀葡萄牙，都咪話唔影響信心，最慘伊比斯域同隊長安達斯碧克又盛傳明年1月會分別轉投布力般同阿仙奴，再睇埋近年對漢堡又輸多贏少，今晚唔似有運行囉！


漢堡鬥賀芬咸往績佔優


日期 戰果




11/04/03 賀芬咸 0:0 漢堡

10/11/06 漢堡 2:1 賀芬咸

10/04/25 賀芬咸 5:1 漢堡

09/12/05 漢堡 0:0 賀芬咸

09/04/04 漢堡 1:0 賀芬咸

09/01/14 漢堡 2:0 賀芬咸