利辛度復出里昂圍攻阿積士

猪拉多纳

20/11/2011
文： 力奇

法甲雙雄里昂同里爾喺提前上周六凌晨舉行嘅聯賽繼續低迷，其中里昂喺主場以1:2不敵雷恩，里爾則作客悶和圖盧茲0:0。兩班波嚟緊周中都要喺歐聯出爭生死戰，里昂算係收到唯一好消息，休戰14場嘅射手利辛度盧比斯剛戰已經正式復出，想話砌低阿積士總算增加番多少本錢。


里爾征莫斯科信唔過


里昂昨晨喺法甲表現其實都幾令人失望，先入一球都夠膽死輸番畀雷恩1:2，3連敗狀態同士氣都唔掂。佢哋喺歐聯D組排第3，落後次席阿積士3分，今次對碰根本係唔贏唔掂。射手利辛度盧比斯之前因為足踝傷患抖咗兩個幾月，剛戰復出踢咗唔夠30分鐘，想話即刻谷番起狀態其實好難，但話晒佢都係質素高同把握力強嘅射手，算係里昂對阿積士嘅奇兵。




至於里爾雖然話保持住聯賽12場不敗，但查實佢哋成日和波，喺歐聯同法甲夾埋已經連續4場贏唔出，佢哋家陣喺歐聯B組排包尾，落後次席莫斯科中央陸軍3分，嚟緊周三作客俄羅斯又係非勝不可，不過以佢哋個衰款，睇怕都係玩唔過。