魔咒纏身史篤城搵你愛

猪拉多纳

04/12/2011
文： 樂比堅尼

另一場英超愛華頓主場對史篤城，樂比仔食「拖肥糖」唔食「城篤史」。愛華頓季初踢到一團糟，但最近二連勝，似乎已企穩陣腳，史篤城今季「歐霸後遺症」情況嚴重，之前四次踢完歐霸盃分組賽，返到聯賽全部輸晒，今場一於繼續捉住呢條攤路，捧主勝！


（有線200及300台周日晚11時直播）


愛華頓債務問題非常嚴重，今季喺冇錢增兵嘅情況下，都唔能夠抱太大期望，幸好領隊莫耶斯經驗豐富，而且同球員關係相當好，所以愛華頓捱過咗季初傷兵多及阿迪達離隊嘅艱難時期後，最近成績亦穩步上揚，新仔魯迪維爾演出續見進步，實在可喜可賀。

「歐霸後」四戰全敗

史篤城今季最大隱憂就係要兼顧歐霸，對呢間細球會嚟講係極大負擔，雖然領隊佩尼斯都會輪換球員，但去到出線關頭，上周中對基輔戴拿模都焗住要用較多主力，好似賀夫、希堅保咸、賓納及戴納都正選上陣。


睇番史篤城今季踢完歐霸分組賽後嘅聯賽成績，可用恐怖嚟形容，四場全部輸晒，而且對手只係史雲斯、保頓、新特蘭等下游球隊，值得留意係呢四場聯賽史篤城都係作客，今次史篤城又遇到「歐霸後」兼作客呢個死亡組合，睇怕都難有奇迹出現！