杜Sir用加歷查自找麻煩

猪拉多纳

04/12/2011
文： 黃興桂

「紅軍」利物浦表現漸入佳境，近期兩次作客擊敗車路士後，有好多球評家都話領隊「杜Sir」杜格利殊，好過車仔少帥保亞斯。香港紅軍球迷都清楚球隊點解可以回勇，其中一個主因就係後防老將加歷查三四星期前受傷，令杜Sir改用較年輕嘅丹尼爾艾格及史卡迪爾扼守中路，減少咗防線漏洞。


缺點成籮應狠心棄用


事實上，好多香港紅軍fans都唔想加歷查上陣，佢轉身慢、反應鈍、唔夠快，幾乎集所有防守球員大忌於一身，但由於佢屬於利物浦青訓產品，係球隊忠臣，先至得到歷任名宿領隊重用。Peter認為有料嘅領隊，做事應該當機立斷，球員唔夠水平，必須心狠手辣棄用。眷戀過去、太注重感情嘅主帥，只會令自己走向失敗。感情係留畀家人，工作則應對事不對人，必要時更需心狠手辣。




Peter絕對唔會用加歷查呢種轉身慢、反應鈍、唔夠快嘅守將，就算丹尼爾艾格同史卡迪爾唔好彩受傷，都寧願起用年輕小將。利物浦今季要爭英超冠軍並唔容易，但佢哋毋須兼顧歐洲賽，要奪取本土英聯盃及足總盃嘅機會仍然樂觀，尤其係英聯盃已打入四強，只要過埋曼城呢關，決賽對手只係英冠球隊，屆時紅軍應可一嘗久違嘅捧盃滋味。




金句：加歷查缺陣，紅軍就穩陣