巴塞受讓激襲皇馬

猪拉多纳

10/12/2011
文： 法比加輝

西班牙國家打吡戰殺到，皇家馬德里在巴拿貝主場迎戰巴塞隆拿。無可否認皇馬自上年聘請莫連奴掌帥之後，球隊一日比一日進步，現時更力壓巴塞暫列榜首，屬最有機會終結巴塞王朝嘅一季。不過加輝要提醒大家，皇馬贏晒其他球隊，並唔代表能夠宰殺巴塞，要知道哥迪奧拿在○八年上任後，巴塞未曾在法定時間內輸過畀皇馬，今場受讓平半豈能錯過。（now 632周日清晨5時直播）




老實講，都唔知幾耐未見過巴塞有得受讓！皇馬今季的確係氣勢逼人，周中歐聯例行公事贏埋阿積士之後已寫下十五連勝，而且今季聯賽與歐聯合共九場主場又係全勝，莊家秤高皇馬些少，讓平半不難理解。但正如我頭先所講，贏晒全世界又如何？皇馬近季未贏過巴塞屬不爭事實，而且每場都處於下風波，單憑「氣勢」就能扭轉多年劣勢？未免有點天真。


近11次對賽巴塞「未輸過」


事實上，由哥迪奧拿一手打造破盡紀錄嘅「夢之隊」，最強之處就係面對強隊都當你細路咁搓佔盡優勢，因此從○八年開始，巴塞十一次對賽在法定時間內未曾輸過畀皇馬，錄得七勝四和佳績，縱然「寸王」被譽為全球最佳教練，但面對巴塞亦束手無策！「莫帥」試過同死敵鬥攻，結果慘烈地淨吞五蛋，又試過複製二○一○年國米在歐聯淘汰巴塞嘅「鐵桶陣式」，但全民皆守就贏唔到波，所以對賽早已證明一點：唔夠踢就係唔夠踢！




星光熠熠球迷之福




再者，皇馬現時領先巴塞三分兼且踢少一場，撇開兩軍仇怨，其實皇馬在今場和波亦有着數，起碼保持住領先優勢。反而巴塞可能會踢得更主動，務求贏波去縮窄兩軍距離。兩軍都冇主力球員唔出得，可以最強陣容應戰，而且雙方又在周中歐聯大為留力，全力應付今場比賽，無論戰果如何，都屬球迷之福。