史浩克不來梅攜手送「大」禮

猪拉多纳

17/12/2011
文： 走肖

聖誕未到，德甲雙雄就提前送「大」禮，史浩克04今晚喺德甲主場對雲達不來梅，入球大要吼到實。首先史浩克喺歐霸盃收埋晒啲主力，擺明搏殺格，其次不來梅連續6年歇冬前開入球騷，射手比沙路仲執到好籌有機會跳槽去國際米蘭，點會唔想入波先？（有線61、64、201及204周日凌晨1:30直播）




由於史浩克提早出線，歐霸盃對海法馬卡比派出副選Hea踢，前鋒亨特拉爾、魯爾、中場賀治比同鍾斯全部休息唔使踢，當中受惠最大，梗係34歲嘅魯爾啦，呢場佢叉足電隨時發威。更何況消息話史浩克負擔唔起佢嘅高薪，打算出年暑假放佢走，據講魯爾有興趣去中超搵人仔，嚟緊要踢爭氣波至得。


不來梅近6季歇冬前都開大


對手不來梅今季總算回復有前無後本色，近期不斷開入球大益街坊，而且佢哋臨近歇冬，就特別有放假Mood踢快樂足球，對上6季歇冬前嗰場波全部開入球大，最誇張係07/08年球季主場以5:2大炒利華古遜，期間有4勝2負未試過和波，睇得出不來梅唔傾向喺放假前踢悶波。




仲有呀，暫時喺聯賽攻入12球嘅比沙路，突然話畀國米睇中，雖然不來梅高層把口話唔會放人，但如果國米出價合理，31歲嘅沙比路絕對有可能拎到職業生涯最後1份肥約。再者，史浩克有正選門將費文養緊傷，就算不來梅中場肯特停賽削弱攻擊力，依然夠條件開入球騷預祝球迷聖誕快樂，今場買1.52倍入球大着數。