「金錢帝國」繼續打橫行！

猪拉多纳

01/01/2012


2011年英超可以話屬於曼城，進軍歐聯、瘋狂買人、喪炒曼聯、高踞榜首唔到你唔服。根據領隊文仙尼嘅寸嘴預言書，「金錢帝國」將會喺2012年繼續打橫行，而且準備好趁轉會市場重開再入貨，迎接1月地獄賽程25日踢7場波搶冠軍。今晚新特蘭主場對曼城嘅賽事，文仙尼會向全世界證實佢嘅預言冇錯。




曼城踏入1月要25日應付7場波，當中包括聯賽盃對利物浦，足總盃撼曼聯同聯賽鬥熱刺，而且出爐非洲足球先生耶耶托尼，嚟緊要聯同大佬高路托尼為科特迪瓦踢非國盃，加上米卡李察士成日受傷，史提芬沙域不滿長坐冷板要求外借，奧奴夏同布歷治又預咗被清洗，到處火頭，唔少傳媒覺得曼城即將冧檔。


預咗新年後失榜首


面對聯賽盃、足總盃同聯賽3線硬仗連場，文仙尼已經向聯賽會發炮，認為曼城要3日內連續對新特蘭同利物浦，簡直亂嚟，但佢預言聯賽錦標始終會由曼城奪得：「我哋都知道，球隊排名可能會喺新年後下滑到第2位，不過聯賽仲有20場，曼聯又有唔少難打嘅作客賽事，相信到時我哋會追番上榜首。」




文仙尼咁講唔係冇道理，今季曼城作客已對過晒熱刺，曼聯、利物浦同車路士，相反紅魔下半季要作客對熱刺、車路士、阿仙奴同曼城，大把機會失分，而且曼城跨季連續30場聯賽主場不敗，拎到28勝2和，僅次於1919至21年創造嘅連續41場主場不敗球會紀錄，只要應付好剩低嘅作客賽事就捧盃在望。


睇好前鋒3箭入80球


仲有就係，曼城老闆文梳亞為文仙尼提供無限金錢買人，現時曼城收購目標包括AC米蘭前鋒柏圖、里爾中場夏薩特同皇家馬德里中堅艾比奧爾，全部分量十足，原本文仙尼預言，阿古路、巴洛迪利同迪斯高今季連盃賽會夾份入80球，假如再用泰維斯換柏圖返嚟嘅話，肯定唔只呢個數，捱過1月地獄賽程，聯賽冠更加係袋硬咁滯！


曼城1月地獄賽程


日期 對手 賽事 難打指數

12/01/01 作客Vs新特蘭 英超 ★★★

12/01/03 主場Vs利物浦 英超 ★★★★

12/01/07 主場Vs曼聯 足總盃 ★★★★★

12/01/11 主場Vs利物浦 聯賽盃 ★★★★

12/01/16 作客Vs韋根 英超 ★★

12/01/22 主場Vs熱刺 英超 ★★★★

12/01/25 作客Vs利物浦 聯賽盃 ★★★★★

*難打指數5粒★為最高