天皇盃決戰東京「不」勝無歸

猪拉多纳

01/01/2012
文： 走肖

元旦有咩節目？可以食住晏睇天皇盃決賽！京都不死鳥今日同FC東京合演史上首次「天皇盃J2決戰」，賽前東京「鋼鐵司令」今野泰幸話點都要達成「有終V」，離隊前為東京歷史性捧走天皇盃，信佢要博1.65倍客W。（有線61、148、201及now711台周日下午1:00直播）




日前嘅4強戰，不死鳥加時後以4:2淘汰橫濱水手，加上東京以1:0解決大阪櫻花，造就史上首次天皇盃J2決賽出現。由於柏雷素爾以日乙冠軍身份，奇迹稱霸日職，唔少球迷希望，東京都能夠以日乙冠軍身份，捧起天皇盃袋走1億日圓獎金，兼且拎埋亞冠盃參賽資格，為東日本地震災民帶嚟希望同勇氣。


東京將帥求捧盃告別


講起東京，教練大熊清同隊長今野泰幸可以話冇得頂，佢兩個肯跟球隊降班，絕對係有情有義，到東京攞到升班資格，大熊清同今野泰幸至決定功成身退離隊，不過咁唔代表佢哋走人算數，東京連續3場天皇盃以1:0打沉對手殺入決賽，功勞最大肯定係佢哋，今野泰幸更加係現時日本國家隊必然正選。




賽前今野泰幸話明，離隊前心願係為東京捧盃，唔好忘記，今季東京喺聯賽對不死鳥，首循環作客以4:1贏波、次循環主場以6:1大勝，夾埋贏10:2，就算90分鐘計不死鳥近13場有11勝1和1負，都唔似惡得出。