黑貓當旺平手要根

猪拉多纳

03/01/2012
文： 巨高

「黑貓」新特蘭認真威水，成功砌低英超豪門曼城。新特蘭自從換帥之後表現確有明顯進步，近三場聯賽取得兩勝一和。新特蘭氣勢正盛，韋根就算有主場撐腰都頂唔住，開平手盤必揀客隊。（有線304及204台周三凌晨3時45分直播）




新特蘭解僱前領隊布魯士，改聘奧尼爾接任之後，球隊演出亦重回正軌，就連球員嘅精神面貌都有改善，證明奧尼爾實屬有料之人。強如曼城都唔係佢哋對手，你就知新特蘭依家有幾弗。其實新特蘭人腳質素唔差，陣內有唔少球員効力過大球會，比如賓特拿、基蘭李察臣、奧沙等等，只係前任領隊布魯士未懂得適當運用。喺奧尼爾指導之下，新特蘭應有潛能亦慢慢被發掘。新特蘭仲有幾多上升空間尚未知道，今場對韋根可以睇得更多。


韋根主場好耐未威過


韋根今季都要為護級而努力，奈何實力有限失分頻頻。咪以為主場對於韋根有幫助，其實球隊已經好耐冇喺主場贏過波，最近一次已經係去年八月廿七日以二比○勝昆士柏流浪。留意到韋根喺聯賽首循環贏過新特蘭，但事隔個多月之後，新特蘭已脫胎換骨，平手盤捧客隊坐和望贏。