熱刺有火怒爆西布朗

猪拉多纳

03/01/2012
文： 笛子波童

英超快車熱刺主場迎戰西布朗，西布朗兩日前於主場贏形勢輸波，對球員士氣打擊甚大，而且佢哋比熱刺少一日休息，體力上較輸蝕。熱刺上場失分谷住一肚火，以佢哋今季主場達83%嘅勝率，力足大炒對手出氣，波童捧「讓球主勝」。（有線301及201台周三凌晨3時45分直播）




熱刺首循環憑艾迪巴約梅開二度及迪科爾入波，作客以三比一擊敗西布朗，今返主場再戰依然值得睇高一線。首先，熱刺比西布朗多一日休息，呢點喺應付聖誕、新年快車賽程好有利，加上陣中有加里夫巴利呢位高速球星，相信以其速度足令西布朗守衞食塵，而且論板櫈深度熱刺亦比西布朗佳，今次有主場之利優勢更明顯。


熱刺主場遇弱冇甩拖


此外，兩軍日前同樣在比賽末段失守而告失分，不過熱刺面對主場僅一敗嘅史雲斯表現其實冇太大走樣，作客能夠攞到一分已經算唔錯。




相反西布朗主場喺佔有較多攻勢下，卻在完場前失守而不敵愛華頓，或多或少會影響球員信心。始終熱刺今季主場聯賽表現好穩定，除在曼城、車路士身上失分，其餘六場全部贏晒，呢六場勝仗當中五度贏盤，有如此佳績，今晚可以玩吓「讓球主勝」。