紅軍唔怕曼城

猪拉多纳

03/01/2012
文： :Kit

雖然布力般喺奧脫福搞寸費格遜個生日P，但新特蘭同旁證就「好識做」，送番份禮畀爵爺賀壽，不過呢份禮就貴喇，相信唔少球迷都有份夾錢！呢個英超快車頻頻爆冷，車仔、曼聯、曼城同熱刺均先後失分，今晚嚟到快車最後一站，小妹都係睇死曼城讓唔起當弗嘅紅軍半一，一於敲下盤啦！（有線200、300及廣東體育周三凌晨4:00直播）




曼城早兩日先作客完新特蘭，體力點都差啲，係，你話佢哋坐擁兩班波嘅人腳係講得通，不過咪忘記主力阿古路同大衞施華上場臨尾都係焗住落場搏殺，而且成日話兩班波，但條防線咪又係用嚟用去都係嗰幾件！休息少一日，邊有話冇蝕底先？


藍月亮踢逆境波即死火


仲有，一直以嚟，曼城最大嘅問題唔係班星級球員唔團結，而係件領隊文仙尼冇料到！大家睇咗半季曼城，好可能都會察覺呢班波順風順水嗰陣踢到識飛，但一遇逆境波或咬唔入嘅時候，反而愈踢愈亂，梗係啦，文仙尼臨場指揮根本冇料到，換人只係位換位，陣式用死一個，搞到曼城臨場威力大減。大家試諗吓，如果曼城換咗莫連奴領軍？英超一早都唔使踢啦！可惜家陣唔係吖嘛！


謝拉特上仗復出有料到


遇強愈強嘅利物浦，就正正係有能力逼死曼城嘅球隊。記得早兩個月「藍月亮」作客晏菲路，竟然畀紅軍攻到氣咳，最終靠運守住1分離場。小妹最欣賞嘅，係紅軍一對中堅史卡迪爾同丹尼爾艾格愈夾愈好，家陣利物浦係全英超失球最少嘅球隊，理所當然啦！




前線方面，射手蘇亞雷斯今晚繼續可以上陣，最重要係神奇隊長謝拉特上仗復出，大家真係「驚為天人」，「四哥」抖咗咁耐，一出場就即刻有料到，精準嘅長傳、埋門嘅超強把握力，簡直係神奇、頂級、超卓！咪忘記利物浦上仗以3:1輕取紐卡素，狀態同信心返晒嚟，加上佢哋今季作客勁過主場，對住強隊又例有貨交，今晚受讓半一當然值得支持啦！


橫數千軍


 曼城半場少落後

‧近8場5勝1和2負，半場未試過落後。

‧目前英超主場王，9戰全勝，勝率達100%。

 紅軍近戰旺開細

‧近8場4勝3和1負，有7場開出入球細。

‧近6次交手1勝4和1負，今季首循環主場踢成1:1。

KIT推介：利物浦（下盤）

有線球彩台主持KIT

電郵：soccer64@cabletv.com.hk PHONE波熱線：1831 678

「球盤傳真」開放時間：周二晚10:30至11:45

賽果熱線：2707 9900　周三清晨5時20分起至晚6時止