馬拉加軍費西甲No.3

猪拉多纳

03/01/2012


中東資金認真唔講得笑，馬拉加近日舉行股東大會，通過喺2012年追加8,300萬歐元（約8.35億港元）軍費，令到11/12年球季總資金投入高達1.5億歐元（約15.1億港元），成為皇家馬德里同巴塞隆拿後，今季西甲軍費數目No.3，據講馬拉加已準備喺轉會市場再瘋狂掃貨。


投資僅次巴塞 皇馬


皇馬同巴塞球星如雲，今季資金投入分別係4.88億歐元同4.61億歐元。由於歇冬前馬拉加表現唔曳，暫列聯賽第7位，為咗爭踢下屆歐洲賽，馬拉加股東大會通過再投入8,300萬歐元，主要用嚟買人，今季總資金投入1.5億歐元位列西甲第3位，跟住係馬德里體育會嘅1.3億歐元，同埋華倫西亞嘅1.15億歐元。


1月再掃貨想斟費托


隨住祖亞昆受傷要休息1個月，馬拉加入貨心態更積極，除咗之前提過諗住用2,500萬鎊，接收喺車路士坐冷板嘅前鋒費蘭度托利斯，仲想簽皇馬中場格尼路、華倫中場柏利祖同維拉利爾中場保查華利路，明顯希望成為皇馬同巴塞以外嘅西甲第3勢力，睇怕轉會市場重開後又有好戲睇。


西班牙盃賽制


採主客兩回合淘汰制，今輪為16強首回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。