熱刺撼疲兵西布朗冇留手

猪拉多纳

03/01/2012
文： 力奇

今季搖身一變成為英超爭標分子嘅熱刺，今晚返到嚟白鹿徑嘅無敵主場，迎戰實力平平嘅西布朗，3分志在必得。最緊要係西布朗仲要係喺48小時內連踢兩場，連體力都輸埋，今晚仲唔做炮灰？1.92倍「讓球主勝」咪走雞！（有線201及301周三凌晨3:45直播）




目前喺聯賽榜排第3嘅熱刺，只係落後曼市雙雄6分，仲要打少場波，話佢哋有機會爭標絕對唔係講笑。上輪佢哋作客畀史雲斯摸和1:1，賽後射手雲達華治就即時鬧醒班隊友，要把握力好啲，唔好再失分畀弱隊，試問今次返到嚟主場出擊，仲點會再有大意事件發生？


西布朗近6次訪熱刺2和4負


再者，熱刺今季喺白鹿徑踢聯賽真係曉飛一樣，除咗首戰慘敗畀曼城外，之後7場主場戰就取得6勝1和佳績，先後贏過利物浦同阿仙奴，上輪對車路士都只係被對手逼和，今仗仲點會驚西布朗？就算話今鋪有中場重心柏加入埋傷兵營，都有足夠替補去大勝一場。




西布朗呢邊，喺鶴臣領導下算係打得唔錯，家陣排緊12位。可惜近況唔算突出，之前2輪喺主場只係得1和1負，兼且波都入唔到個。最慘係佢哋前晚先同愛華頓激戰完，少對手一日休息時間，家陣未抖夠又話要再落場，後備力量又冇熱刺咁強，想話輪換吓都難，以佢哋近6次出訪熱刺得2和4負去睇，都係凶多吉少啦！


橫數千軍


 熱刺主場8戰6勝




‧開季至今聯賽主場8戰得6勝1和1負。

‧加里夫巴利今季入7球，已多於上季。

 西布朗火力唔掂

‧開季至今19戰入19球，火力為英超尾4。

‧兩軍歷來英超交手平均每次炮製2.82個入球。