畢爾包唔齊腳難贏丙組仔

猪拉多纳

03/01/2012
文： 亨格比利

西甲本周六先回歸，但今晚就有西班牙盃16強畀大家止吓咳。阿爾巴塞特喺主場越兩級挑戰畢爾包，呢支丙組仔上一圈已經嚼低過馬體會，今晚對住陣容不整嘅畢爾包隨時又再偷到雞，受讓一於捧2.45倍「讓球主勝」。（開賽時間：周三凌晨3:00）

阿爾巴塞特上圈淘汰馬體會

阿爾巴塞特最近突然成為焦點，除咗因為獲巴塞球星恩尼斯達注資入股之外，上一圈西盃仲兩挫馬體會爆冷晉級。西班牙各級聯賽周末先重開，阿爾巴塞特球員冇因為要縮短假期踢西盃詐型，會方前日仲搞咗個交換禮物Party，士氣不知幾好。


講實力，畢爾包當然贏阿爾巴塞特幾條街，不過佢哋對上7次造訪主隊個卡路士貝馬迪球場輸咗4次，除咗前鋒迪馬高斯打柴之外，中場安達靴里拉同前鋒洛蘭迪亦分別因為鼠蹊同左膝傷上陣成疑，阿爾巴塞特首回合要保不敗唔係冇機o架！