車仔飲得杯「諾」

猪拉多纳

21/01/2012
文： 朱楓

今日洗完邋遢，最好就係睇英超Relax吓！頭場諾域治主場對車路士，「藍戰士」近況回勇，費托近日仲狂練射門，誓要喺年廿八「大」掃除洗走烏氣，今晚對住有前冇後嘅「金絲雀」，睇怕都會係一場入球騷，捧車仔1.47倍客W之餘，一於玩埋1.59倍入球大！（有線200及300、廣東體育周六晚8:45直播）


費托擔正加操狂練射門


車路士上周喺主場搞掂新特蘭，最近已錄得3連勝全面回勇，當中中場林柏特仲連續3場入波添，杜奧巴同沙洛文卡勞離隊踢非國盃，影響似乎唔算太大。




杜奧巴暫時離隊，最大得益者當然係費蘭度托利斯啦！最近「王子」都有幾多新聞，最令人意外嘅，係巴黎聖日耳門新帥安察洛堤話車仔向佢兜售費托，「肥安」唔單止請車仔食檸檬，仲叫保亞斯賣走杜奧巴，先可以令「王子」復活喎。老實講，朱楓覺得費托近期表現唔係太曳，助攻助守都有貨交，只係差緊啲運先入唔到波啫。查實費托近日已頻頻加操狂練射門，今晚作客「豆腐」諾域治，絕對係證明自己值5,000萬鎊身價嘅最好時機。




今季英超除咗昆士柏流浪，其餘兩支升班隊伍史雲斯同諾域治，都同樣令人眼前一亮，當中諾域治更被英國球評家形容為翻版黑池，皆因佢哋踢法極具娛樂性，一對箭頭格蘭荷特同史提芬摩利臣頻頻入波，幫「金絲雀」錄得3連勝，不過進攻好睇嘅代價，就係後防頻頻失波！


諾域治英超場均失逾1.7球


唔講唔知，原來諾域治踢咗21場英超，竟然冇一次保住清白之身，平均每場更失超過1.7球，喺今晚對車路士前夕，諾域治仲同防線最有星味嘅迪拿特解除租約，畀佢重返曼聯，睇嚟「金絲雀」就算趕得切簽入列斯聯隊長侯臣，都好難改到有前冇後嘅踢法，分分鐘前面入埋都唔夠後面失！


横數千軍


 諾域治場場聯賽失波

‧今季英超有一半入波喺最後30分鐘取得。

‧今季英超場場均有失波。

 車路士對賽旺開「大」

‧已連續12場英超有波入。

‧近6次交手未輸過，獲5勝1和，對上5戰均開大。