送兔迎龍 賀歲大戰

猪拉多纳

22/01/2012


今晚英超「送兔迎龍」好戲碼，打頭陣係曼城主場對熱刺，大家可以食住團年飯睇波，搭正年初一即有另一場重頭戲，由「兵工廠」阿仙奴主場迎戰「紅魔鬼」曼聯。記得呢兩場波首循環交鋒時，咁啱又係編埋同一日，結果曼聯大勝八比二，曼城則贏五比一，兩場大戰合共炮轟十六個入球，堪稱英超史上嘅「大奇迹日」，樂比仔深信今番再度碰頭，四隊會再次擦出火花，唔使諗咁多，一於捧晒大盤！


阿仙奴紅魔宿敵再駁火


先講阿仙奴主場對曼聯，我哋將時鐘撥番到去年八月二十八日，當時陣容不整兼早段踢少一人嘅阿仙奴，慘被曼聯蹂躪，寫下球會英超最大敗仗嘅二比八，領隊雲格呆滯嘅表情，相信無論係阿仙奴或曼聯嘅球迷都記憶猶新，今場未開波雲格額頭已寫上「復仇」二字，贏唔贏到好難講，但肯定會同曼聯搏拳，樂比仔建議捧大盤！（有線200、300及204台周一凌晨零時直播）




相信好多人都會同意，阿仙奴最大問題來自防線，今季踢咗二十一場失三十一球，失球數字竟然係英超第七高，以一支前列球隊嚟講，簡直係不敢想像！目前阿仙奴兵源買少見少，沙格拿、基蘭基比斯及安德里山度士受傷，中路嘅梅迪薩卡及哥斯尼又不穩，今場都唔好話有冇把握贏波，失少幾球已算有所交代！


史高斯復出曼聯更立體


事實上，曼聯經過快車期間連輸兩場後，最近已有回勇迹象，先喺足總盃以三比二擊敗宿敵曼城，再喺上場聯賽大勝保頓三比○。加上史高斯復出，曼聯中前場排陣更加立體。




喺形勢上，曼聯目前落後榜首嘅曼城三分，即使今場要作客亦冇得保留，因為嚟緊仲要對車路士同埋利物浦。而排第五嘅阿仙奴，未計今輪亦落後車路士四分，如果要爭歐聯入場券嘅話，今場亦一定要搏命，所以捧大盤係最佳選擇！