巴塞發惡轟散奧沙辛拿

猪拉多纳

11/02/2012
文： 查理阿蛋

對於「地上最強」嚟講，和波就係輸波嘅代名詞，偏偏巴塞隆拿今季作客頻頻失分，被榜首嘅皇家馬德里拉開7分差距之下，想衞冕西甲錦標，嚟緊每場聯賽都成為生死戰！今晚「地上最強」作客奧沙辛拿，既然多數主力都能夠復出，必定踩行油數多幾粒一吐烏氣，小妹當然捧1.67倍「讓球客勝」啦！（now632台周日凌晨3:00直播）


近6次交手入21球


受傷嘅老虎永遠係最得人驚，巴塞隆拿終於喺周中嘅西班牙盃爆發，淘汰華倫西亞殺入決賽，該役除咗有兩位中場大腦沙維同恩尼斯達復出外，表現神勇嘅法比加斯亦成功打破近6場入球荒，成班主力嘅狀態可以話係返晒嚟！「地上最強」今仗雖然有歐聯呢個後顧之憂，不過16強對手利華古遜並唔算太難應付，絕對可以集中火力轟散奧沙辛拿。




對奧沙辛拿嚟講，巴塞隆拿4個字，絕對係代表住一個噩夢，皆因兩軍近6次對決，奧沙辛拿合共失咗21球，「地上最強」全數獲勝兼只失過1球，難怪教練文迪列巴及中場尼古納姆都異口同聲咁話：「巴塞的確係當今世上最好嘅球隊。」


眾星交足貨氹哥帥續約


再者，一手將巴塞提升至另一層次嘅哥迪奧拿，更响賽前傳出聲氣，話視乎球隊表現而考慮續約多一年，至少留到2013年，對佢推崇至極嘅巴塞眾星為咗說服教練留隊，今場實會踢番場好波盡顯誠意啦！使乜驚巴塞開唔到個「讓球W」呀？