貝迪斯搶分護級「畢」求人

猪拉多纳

11/02/2012
文： 鄭少偉

今晚西甲尾場上演貝迪斯主場大戰畢爾包，「亨利」同唔少球員同行都幾欣賞呢兩隊波今季嘅打法，夠進取得嚟又鍾意上腳，做好多小組進攻鬼咁好睇，仲要雙方球員個人技術都有番咁上下，自然夠晒娛樂性啦！今仗平手盤「亨利」撐貝迪斯。（now632台周日清晨5:00直播）




貝迪斯呢班波，其實有番咁上下質素，但就衰在海鮮波，神起上嚟可以隊冧華倫西亞，但沉起嚟又夠膽死10場不勝。講真吖，如果唔係演出咁唔穩定，計班波嘅質素又點會搞到依家喺西甲排尾4，淪落到喺護級漩渦掙扎吖！好在家陣個榜尾形勢七國咁亂，下游嗰8、9支球隊積分差距甚少，只要把握主場優勢搶到分，話咁易又彈番上去，所以今場貝迪斯班球員嘅戰意一定毋須懷疑，「亨利」撐硬佢！


畢爾包賽程頻密踢到殘


本來今場作客嘅畢爾包近況都唔曳，可惜就潛在唔少隱憂，自歇冬後呢個幾月，足足踢咗11場波，差唔多隔兩日就踢一場，當中仲有唔少硬仗。如果你有皇馬咁嘅陣容就梗係無所謂啦，但畢爾包人腳本已窄窄哋，踢得咁密，班球員未必應付得嚟。嚟緊周中歐霸盃戰線重開，啱啱先博到入西班牙盃決賽嘅畢爾包又要搏命，仲要飛去俄羅斯，點捱呀？今場真係戰意難測，「亨利」建議都係避一避喇！