國米報仇有條好路

猪拉多纳

12/02/2012


意甲國際米蘭近況不佳，盛傳前任英格蘭領隊卡比路會接手。雖然消息仍有待雙方確實，但對現任國際米蘭教練雲尼亞里必構成一定壓力。為保住帥位，雲帥真係要盡快交出好表現，今晚聯賽對包尾大幡路華拿，國際米蘭肯定要拚盡所有，預料今場「藍黑兵團」會喺主場大勝，「讓球主勝」可捧。（周日晚10時開賽）




阿特蘭大求勝心「切」




國際米蘭今場有利好消息傳出，就係烏拉圭前鋒科蘭身體狀態已回復正常水平，今晚可候命出擊，而最近一次主場賽事連入四球嘅迪亞高米列圖，亦應繼續受到重用，攻力毋須懷疑。路華拿喺聯賽首循環曾以三比一贏過國際米蘭，相信國米球員都想復仇，鬥志百分百，所以一定要吼實。




另一場意甲由阿特蘭大主場對萊切，就睇好主W。阿特蘭大雖係升班球隊，但頭半季賽事已證明實力不弱，遇到降班熱門嘅萊切，應可順利勝出。




波圖「-2」照捧場




最後介紹番一場葡超，由上季聯賽冠軍波圖對利亞拿。現時波圖仍然落後畀榜首賓菲加，未來日子一定會急起直追，爭勝鬥志一定唔會差。加上波圖聯賽主場成績極佳，至今錄得八勝一和不敗佳績，今晚遇到下游球隊利亞拿，波圖可望大發神威，以大比數怒炒對手。雖然讓球主客和方面，波圖要「-2」，但相信對波圖冇難度，照捧「讓球主勝」。