新特蘭大報復

猪拉多纳

18/02/2012
文： 蘇豪

英格蘭足總盃第5圈賽事，阿仙奴作客新特蘭，「兵工廠」剛於歐聯畀AC米蘭狂數輸到慌，今次背城借一爭英足盃，決心一定夠！但球隊恐怖防線嚇死街坊，隨時前線入埋唔夠後面輸，今場作客仲要讓波咪搞，玩入球大好過！（now 671及672周日凌晨1時15分直播）




阿仙奴日前歐聯作客ＡＣ米蘭，中堅哥斯尼於上半場傷出，換入佐羅頂上，結果此子畀伊巴謙莫域玩謝。另一中堅華美倫近排串演左閘，上仗重返中路冇晒位置感，甩漏多不勝數，最終淨吞四蛋，今仗梅迪薩卡繼續休戰，哥斯尼難望披甲，主帥雲格被迫續用佐羅拍住華美倫，呢條防線好牙煙。


亨利離隊旨意尹佩斯


雲格深知阿仙奴於歐聯翻身無望，英足盃已成球隊季內重要目標，今次大軍爭勝決心絕對唔使懷疑，只怕亨利借用期滿離隊後，「兵工廠」前線又要靠尹佩斯爭取士哥，新星阿歷士張伯倫生性都叫幫到手，但望一望佢哋條豆腐防線，蘇豪實在好唔開胃，今仗難保持清白之身，作客讓波捧唔過！




新特蘭於奧尼爾領軍下發揮穩定，單睇人腳唔算好強，但踢落唔講得笑，其中左路新星占士麥堅恩好爆得，前線費沙甘保傷愈後態勇，攻力唔弱！「黑貓」上輪聯賽對阿仙奴發揮好，可惜領先後鬆咗輸番，趁對手依家防線立立亂肯定想報仇，今次有力撕破對手防線，預期兩隊會有唔少士哥，捧大啦！