愛華頓踢場好波送別當路雲

猪拉多纳

18/02/2012
文： 山度士

英格蘭足總盃第5圈今晚開打，度士睇好愛華頓主場可戰勝黑池打入8強，皆因今場係愛華頓借將當路雲離隊前最後一擊，球隊近況亦對辦，估計佢哋可以贏兩粒。（now 671周六晚11時直播）




當路雲踢埋今場就重返美職，而呢位美國隊長確係好嘢，返嚟愛華頓真係幫到手！其實佢上季亦曾以借用形式返嚟「拖肥糖」踢過兩個月，仲曾經當選愛華頓最佳球員，今季食過翻尋味再度當選1月最佳球員，球隊成績亦甚為硬淨。




睇番愛華頓近況，佢哋近七戰僅輸過一場，近三次主場全勝，包括擊敗曼城及車路士兩支爭標勁旅，依家佢哋排英超第十位，爭聯賽冇乜機會，所以更會全力踢好足總盃，今晚再度主場出擊，值得睇好。


黑池留力爭升班


黑池現時排喺英冠第四位，落後榜首韋斯咸同次席嘅修咸頓五分及四分，有機會升班，踢足總盃嘅肉緊程度肯定唔及聯賽。佢哋喺足總盃上一圈首戰同錫周三打和一比一，踢重賽先至贏三比○過關。再睇賽程，黑池下周中將會喺聯賽主場迎戰韋斯咸，呢場六分波對升班大業可謂舉足輕重，今仗足總盃遇上實力同戰意都好嘅愛華頓，黑池未必搏。




前香港足球先生，畀料同佢做人一樣，百足咁多爪，對唔同聯賽都有興趣。教波同貼波，一樣做阿哥。