科蘭過完冷河做救兵

猪拉多纳

22/02/2012


國際米蘭前鋒科蘭終於可以喺歐聯披甲，球會上年夏天擺烏龍，簽下呢位烏拉圭國腳之後，先至知佢唔符合歐聯分組賽上陣資格。經過「過冷河」後，佢可以喺淘汰賽階段，加入歐聯大軍名單，成為國米「雷霆救兵」。




由於科蘭曾於今屆歐霸盃外圍賽，為前度球會馬體會上陣，根據規例，轉投國米後唔可以參與歐聯分組賽，要「過冷河」等到淘汰賽階段先至可以參賽。科蘭等到頸都長埋，揚言要入波報答球隊：「我已經準備好晒，要為球隊作出最大貢獻，身為一位前鋒，首要工作係入波，必要時亦會回後協助防守。」




不過，科蘭自首輪意甲入波後，就未再為國米建功，想喺歐聯打破入球荒，恐怕唔容易。除咗科蘭之外，國米今次歐聯名單亦加入小將安德列普利及冬季新加盟嘅柏林保。