中國迎科威特開入球騷

猪拉多纳

22/02/2012
文： 走肖

冇目標、冇中堅，國足今晚喺主場同科威特踢熱身賽，唔似認真比賽，因為國足已經喺世盃外圍賽提早出局，呢場熱身賽冇任何目標可言，而且受到傷兵問題困擾，今仗可能冇正宗中堅可以用，咁嘅情況，索性踢快樂足球開2.3倍入球大，好過踢悶波畀球迷噓吖！（開賽時間：周三晚7:35）


冇正宗中堅失波難免


比賽喺湖南長沙舉行，賽前國足有可以客串中堅嘅中場鄭智因傷退隊，加上馮瀟霆同趙鵬喺操練受傷，多數唔會冒險落場，李瑋峰同杜威冇入選今次大軍，根據報道，國足可能被迫派劉健同張琳芃扼守中路，要知道佢哋唔係正宗中堅，而且國足喺世盃外圍賽出局後士氣直插谷底，失波在所難免。




既然防線靠唔住，國足要保住僅有嘅尊嚴，教練甘馬曹應該會吩咐球員踢得進取啲，最低限度，今次國足有中超冠軍廣州恒大嘅中鋒郜林孭飛，前鋒于大寶同中場嵩俊閔又分別効力過賓菲加同史浩克04，當中于大寶嘅爺爺近日不幸去世，為咗向離開嘅親人致敬，相信于大寶會落力入波幫手開入球騷。