慕遜加柏執到堡

猪拉多纳

24/02/2012
文： 蘇斯黑柴

德甲獨腳戲慕遜加柏主場鬥漢堡，慕遜加柏愈戰愈勇，踢到季中依然有進步，主場威力驚人，現階段真係冇幾多隊德甲球隊可以抵擋。漢堡防線漏洞百出，作客唔夠砌，慕遜加柏讓半一要捧上盤。




（有線61及201台周六凌晨3時30分直播）




黑柴喺季初已經封咗慕遜加柏嘅瑞士籍教頭法夫爾做偶像，佢用咗一年時間，仲冇乜點買過人，就幫呢支原本位列榜尾嘅老牌球會大翻身，目前只以三分落後榜首多蒙特位列聯賽榜次席，更多班霸拜仁慕尼黑一分。




實幹型嘅法夫爾除咗為球隊打造嚴密嘅防守系統外，亦不斷下苦功針對唔同對手作部署，現時球隊攻守兼備，有成績之餘亦踢得悅目可觀，佢嘅魔法仲令到陣中球員排住隊爆發，將每名球員嘅潛能發揮極致，黑柴相信佢哋除咗有厚望喺下季參戰歐聯之外，亦係今季德甲盟主嘅有力挑戰者。




慕遜加柏主場威力驚人，歇冬後大炒拜仁慕尼黑同史浩克04，取勝過程充滿說服力，雖然佢哋近況極弗嘅小將靴爾文上仗對凱沙羅頓受重創要養傷兩個月，但今仗有箭頭漢基同中堅史蘭斯傷愈復出，人腳只有更加完整。


漢堡穿窿防線難頂


漢堡上仗喺北方打吡主場輸畀雲達不來梅，雖然場面上攞到一定優勢，但前線把握力差，防線更加錯漏百出，成條防線包括門將杜布尼同隊長韋斯達文，表現都完全唔合格，防守中場湯馬士連干更加出晒醜，只可惜教練芬克手上可用兵源有限，今仗想變都冇得變，作客遇上弗爆嘅慕遜加柏根本冇條件抗衡。