熱刺乘勢爆廠

猪拉多纳

26/02/2012
文： 蘇豪

英超今輪上演北倫敦打吡，阿仙奴主場對熱刺，「兵工廠」主帥雲格知道今場好重要，賽前主動叫粉絲團結支持，但雲帥近期民望插水，莫講話球迷，就連一班球員都開始質疑佢，阿仙奴今場實在讓唔起如日方中嘅熱刺，蘇豪捧下盤！（有線200及300台周日晚9時30分直播）




阿仙奴前仗於歐聯作客AC米蘭大敗，上場喺英足盃作客新特蘭再輸，球會面臨連續七年食白果，教頭雲格淪為「英超唐唐」，慘被「廠迷」喪插。雲帥今仗賽前呼籲fans力撐球隊，仲話唔會怪球員踢得唔好。不過，雲格講一套、做一套，啱啱將冇料到嘅艾沙維借返辛尼特，難免影響隊內氣氛。


比堤：阿仙奴內部氣氛差


正如前阿仙奴球星比堤所講，「兵工廠」經過多個失敗賽季後，部分球員開始質疑雲格，一旦出現呢個情況，班波必定冇晒士氣。阿仙奴近仗防線持續不穩，即使今場中堅高斯尼復出亦幫唔到幾多。自從亨利離開後，尹佩斯於前線又要孤軍作戰，睇來睇去，阿仙奴都欠反彈本錢。




熱刺近年一直畀阿仙奴食住，難得今季喺聯賽榜騎住死敵，當然想做北倫敦一哥啦！大軍現時三線人腳都平均過「兵工廠」，左腳王加里夫巴利及莫迪歷當弗，新箭頭沙夏加盟後腳風順，兩大進攻主力雲達華治及艾迪巴約都傷愈踢得，中前場齊晒腳，絕對唔赦阿仙奴！