老婦人，Give me a kiss

猪拉多纳

27/02/2012


仁：麥馬拿仁 高：巨高




仁：高，第一次同你喺《波就係咁講》合作就要恭喜你，尋日凌晨兩場意甲，你推帕爾馬同祖雲達斯「讓球客勝」中晒喎，不愧係意甲專家！




高：唔好咁講，大家研究吓啫。




仁：AC對祖記場波，我開賽前已買定祖記受讓平半下盤，到佢哋落後再買多注，最後一比一真係皆大歡喜。




高：如果連「老婦人」祖雲達斯都唔信，喺意甲都搵唔到邊隊值得投X，只要抱住呢個信念，相信意甲去到季尾前都仲有得執。




仁：意甲去到季尾，你又有乜錦囊畀讀者呢？

高：意甲近年受歡迎程度下降，都係因為假波多，特別係季尾波更多蠱惑，呢樣嘢冇得唔認。但濁中始終有清，祖雲達斯經過「電話門」事件後矢志重上高峰，本季正氣到極，我睇好「老婦人」以不敗姿態捧盃。

仁：祖雲達斯的確抵讚，本季我專吼佢哋作客賽事出擊，鬥弱隊讓得較少、對勁旅仲有得受讓，相信之後仍可依呢條攤路搵食。

高：其實除咗祖記，意甲勁旅嚟緊冇邊隊信得過。AC一向心繫歐聯，聯賽分分鐘揸流攤，讓得多千祈咪盡信；拿玻里人腳唔多，本季難得有得踢歐聯當然輕視聯賽，佢哋一日未喺歐聯出局，投X者都應該抱觀望態度。

仁：我就幾鍾意羅馬，係好好嘅長反對象。

高：冇錯，羅馬有姿勢冇實際，但名氣又大，周時讓波讓到過晒火位，本季反佢哋應該執唔少。