伯明翰主場劏綿羊

猪拉多纳

03/03/2012
文： 麥馬拿仁

今晚英冠十場聯賽，伯明翰主場鬥打比郡捧贏得！「藍軍」為衝英超積極增兵，早前借得安祖斯唐辛同侯錫納普兩大攻擊猛人後，剛又簽得後防拉美治同前鋒卡雷布科蘭，實力、決心兼備，新敗後今仗必搏。「綿羊」打比郡陷入球荒沉爆，作客冇運行。




（now 638周六晚11時直播）




伯明翰本季表現突出，尤其係歐霸盃出局後，於所有賽事曾保持十五仗不敗，施積、馬龍京治、布斯布基等中前場球員輪流發飆，而且又有新星列特文彈起，係去到上仗主場，先意外不敵諾定咸森林。目前伯明翰前六位置絕不穩陣，領隊曉頓近期頻頻㩒掣簽人，除攻力有改善外，後防拉美治加盟更係及時雨，可即時代替受傷卡爾充當右閘。另外上仗意外敗陣，伯軍今仗戰意、求勝心肯定高昂，可以順利「劏羊」。「綿羊」近期表現曳極，七戰二和五負之餘，最大鑊係其中六場冇波入，前鋒占美禾特仲要傷埋，可謂雪上加霜，今戰輸少當贏。


班士利讓唔起森林


另一戰班士利主場對諾定咸森林，近期森林兩連勝大翻身，為搶分護級必砌盡，班軍狀態低沉冇資格讓波，捧「讓球客勝」。列斯聯主場鬥修咸頓，「聖人」最近打出水準，列基林拔上仗更「戴帽」，而列斯新帥禾諾克亦想取得執教後首場勝仗，雙方有機會鬥攻，捧大。