眾星回勇曼城「大」得起保頓

猪拉多纳

03/03/2012
文： 查理阿蛋

曼城終於重現王者本色！「藍月亮」眾星回復季初光芒，大衞施華狀態十足、迪斯高同阿古路亦重拾殺手觸覺，今晚佢哋喺英超迎戰唔識死想鬥攻嘅保頓，絕對有力上演入球騷，就算入球大細中位數改做3.5球，小妹都照捧1.8倍入球大！（有線200、300及廣東體育周六晚11:00直播）


首循環對賽藍月亮贏3:2


隨住耶耶托尼回歸，曼城即刻大反彈，近5場全數奏捷兼只失1球，同早前3場失5球嘅表現差天共地！大衞施華繼喺歐霸盃射破波圖後，周中代表西班牙迎戰委內瑞拉亦有進帳，佢話自己咁弗，全因踢得開心又放心：「（曼城）領隊文仙尼非常信任我，我同各位隊友亦夾得相當好，實在係一種享受！」




今場保頓想全身而退已經夠難，至弊係領隊奧雲高尼仲恃住季初對賽僅負2:3，妄想同曼城對攻：「季初我哋同曼城較量嗰陣表現相當好，今場當然唔會死守。」奧雲高尼可能唔記得咗曼城喺聯賽主場連贏18場，點都好，學人鬥攻，咪仲易開入球大囉！