車路士搵西布朗陪葬

猪拉多纳

03/03/2012
文： 郭球奇

近況低沉嘅車路士，上周大勝一場，總算提升番士氣，不過《ESPN》尋日突然傳出賓尼迪斯就快上「車」，領隊保亞斯為保帥位，今晚喺英超作客近況大勇嘅西布朗，可以話非勝不可，好彩「藍戰士」一向恰慣對手，咁好路，球奇決定信多「新莫連奴」一次，捧1.78倍客W！（有線201及301周六晚11:00直播）


賓尼迪斯最快48小時內上車


車路士上周終於反彈，主場3:0大勝保頓，終止5場不勝走勢，不過有關保亞斯被炒傳言近幾日都冇停過，先有莫連奴被影到返倫敦睇樓，英國《ESPN》尋日就報道，前利物浦領隊賓尼迪斯最快會喺未來48小時重返英倫上「車」，保亞斯唔驚就假。




為保帥位，球奇相信保亞斯今仗一定扭盡六壬爭取連捷。其實「藍戰士」上場贏保頓的確提升番唔少士氣，盛傳同佢不和嘅林柏特都交足功課；賽前曾傳杜奧巴有傷今晚可能缺陣，但球奇覺得只係煙幕，畢竟車路士嚟緊11日內將要應付4場賽事，頭關對西布朗當然唔衰得，以前教過西布朗2年、現任車路士助教嘅迪馬堤奧，今晚應該會畀保亞斯唔少有用資料制敵。


西布朗11次英超交手全敗


西布朗近期改打433陣式後，表現脫胎換骨，連炒狼隊同新特蘭，當中前鋒奧丹維治仲個人包辦5球，不過賽前好多英國傳媒都話唔睇好佢哋可以延續佳績，一來西布朗今季對住「Big5」，即曼市雙雄、車路士、阿仙奴、利物浦同熱刺，竟然只得1和6負，擺明欺善怕惡，更重要係近20次對車路士未贏過，得2和18負，史上11次英超交手仲要全敗，擺明畀「藍戰士」食到應一應。