祖記後防冧檔「博」唔過

猪拉多纳

07/03/2012
文： 亨格比利

今晚意甲補賽，祖雲達斯造訪博洛尼亞。齋睇牌面當然係「斑馬兵團」秤先，不過佢哋呢排係咁失分，今晚仲有一對中路守將唔出得，博洛尼亞唔係冇得鍊o架，博2.1倍「讓球主勝」。（now633及660台周四凌晨1:30直播）




25場聯賽保持不敗好叻咩？睇番歷史，78至79球季佩魯賈又係全季不敗，最終咪又係捧唔到盃，祖記家陣落後畀「一哥」AC米蘭3分，除咗因為踢少場，另一個原因係和波太多，至今足足和咗12場，近5場聯賽就有4場失分，狀態非常一般。


博洛尼亞歇冬後僅1敗


教練干地將低沉戰績歸咎於「FIFA病毒」，指陣中10位國腳自上周踢完國際賽歸隊之後個個謝晒，不過球會名宿莫路就彈「斑馬兵團」冇鬥心先係主因。賽前干地收到壞消息，上仗對基爾禾勇戰受傷嘅基亞連尼要抖15至20日，巴沙利亦因為小腿受傷唔出得，今仗極可能要用到邦路斯搭馬田卡沙利斯（右圖左）呢對副選中堅孭重飛。




博洛尼亞踏入2012年只曾1敗，以後衞拉治為首嘅一班球員，日前指陣營氣氛前所未有咁好，希望會方可以畀一紙長約教練皮奧利，全隊上下一心，照計要頂住頹兵祖記唔係天方夜譚。