華歷簡奴勁到嚇親莫帥

猪拉多纳

11/03/2012
文： 蘇斯黑柴

今晚兩場德甲，喺菠菜角度都唔係黑柴杯茶，決定踩過界吼西甲冷門，睇中早場冇直播嘅愛斯賓奴主場對華歷簡奴，淨計今年嘅表現同成績，華歷簡奴可以話係西甲除皇馬同巴塞外最火球隊，推介3.35倍客Ｗ。 （周日晚7時開賽）


黑柴睇西甲直播最多嘅都係皇馬同巴塞，記得上月尾華歷簡奴主場皇馬，主隊全場形勢同控球指數竟然都佔上風，客軍最終只靠C朗屈機險勝1:0，皇馬近期喺西甲10連勝，當中贏得最辛苦就係呢場，連莫連奴賽後都抹晒汗，讚主隊理應得分。華歷簡奴近5場除呢場外贏晒其餘4仗，共入13球，射手米捷踏入今年9場入7球，入球數字只少於兩大球王美斯同C朗，上仗佢哋落後兩球下連入4粒反勝桑坦德，狀態勇得交關。

作客愛斯賓奴爆得

對手愛斯賓奴近5場聯賽未贏過，主場入球能力亦長期偏低，今仗仲陣容不整，中場查維馬基斯同射手彭迪安尼養傷，中堅魯爾洛迪古斯啱啱加入傷兵行列，守將科連同中場華迪美韋斯停賽，黑柴嫌1.75倍「讓球客勝」冇肉食，直取客Ｗ。