帕爾馬受讓米錯過

猪拉多纳

17/03/2012
文： 巨高

衞冕意甲嘅AC米蘭，本周將作客護級分子帕爾馬。AC米蘭最近趁競爭對手祖雲達斯頻頻失分，成功搶走並鞏固榜首位置。當然，論近況AC米蘭確係幾好，但略嫌比賽較為頻密，加上有唔少主力受傷，今場未必讓得起帕爾馬。其實帕爾馬仍要爭分護級，鬥志唔會差得過AC，主場受讓不妨留意吓「讓球主勝」。　　　（now 633周日凌晨1時直播）


AC賽程密傷兵多


AC米蘭一對巴西前鋒羅賓奴及柏圖都因傷缺陣，另外中場奇雲保定、後衞尼斯達、阿比迪及安東尼連仍處於休養期，連同中堅麥薩斯停賽，AC米蘭可用嘅球員其實唔多，今場難免要以殘陣出戰帕爾馬。如果AC只係一周一賽，相信紅黑兵團有足夠能力應付到傷患問題。但佢哋又要兼顧歐聯賽事，球員體力未必可及時回復正常水平，勢必大大影響聯賽發揮。


伊巴謙唔妥阿里基


仲有，近期盛傳伊巴謙莫域與教練阿里基鬧不和，二人經常因戰術問題而出現爭執，上述不利消息對於球隊肯定有影響。




其實伊巴謙莫域向來性格火爆，除「金牌教頭」卡比路可成功將佢收服之外，以前喺巴塞隆拿亦同教練哥迪奧拿吵過，最終更搞到不歡而散。依家嘅伊巴謙莫域心浮氣躁，今場表現突然失準都唔出奇，如果連佢都失準，AC想全取3分難度更高。




帕爾馬搶分鬥志鮮明，縱然近期未贏過，但演出絕唔失禮。除「10號仔」基奧雲高要留意之外，仲要留意後備殺手奧卡卡卓卡，呢個前羅馬前鋒速度極高，今晚可乘AC米蘭後場陣容不整，憑藉高速衝散對手防線，屬帕爾馬另一取分武器。