皇馬唔放過馬拉加

猪拉多纳

18/03/2012
文： 鄭少偉

歐洲好幾個主流聯賽嘅爭標形勢都七國咁亂，唯獨皇馬喺西甲獨領風騷，lead住10分印印腳，睇住巴塞隆拿喺後邊得個追字。大把喺手嘅「銀河艦隊」今晚會喺地頭迎戰馬拉加，為咗繼續穩住「一哥」席位，喺擁躉面前又點會放過馬拉加？值得各位老友捱夜捧1.46倍「讓球主勝」。（now632台周一凌晨4:30）


今季皇馬真係勁到冇朋友，特別係西甲戰線，踢咗20幾場波都只係和1場、輸2場，加埋失咗8分咁大把，重奪西甲冠軍似乎只係時間問題。


皇馬可以咁把炮，全因火力勁到不得了，一個C朗嘅入球數字，差唔多多過馬拉加成隊嘅總和，雖然唔少人認為C朗又獨食又貪功兼愛出風頭，但「亨利」就覺得球壇多幾個C朗，真係球迷同投X人士之福就真，最抵錫係即使大局已定，但為咗同死敵美斯爭做神射手，呢位葡萄牙球星仍然唔會浪費機會。

C朗 希古恩爭入百球

睇番C朗離開曼聯之後，已經响西甲取得98個聯賽入球，佢隊友希古恩亦喺各項比賽為皇馬射入98球，兩大射手都希望於今場完成「百球偉業」，相信買咗皇馬盤或入球大嘅朋友，就算最終唔夠數，條氣都順啲呀！


計落C朗都算正氣，咁嘅球員都要畀人針對，「亨利」真係戥佢唔抵！只要C朗保持住呢種比賽態度，就算對手馬拉加個陣容幾咁有級數，結果都係做炮灰居多，今場入球大細中位數改做3.5球，如果嫌「讓主」得1.46倍唔好分，不如轉玩1.75倍入球大。