祖記回勇反彈再o趙AC

猪拉多纳

20/03/2012
文： 朱楓

今晚意大利盃4強次回合，祖雲達斯主場對AC米蘭雖然冇直播，但都值得大家花時間上網搵Link睇！事關呢場係國家打吡夠晒激之餘，祖記日前仲成功反彈重拾信心，今鋪對住殘陣嘅AC，朱楓覺得「老婦人」有本錢再贏多鋪殺入決賽，捧2.1倍主W！（開賽時間：周三凌晨3:45）




首回合祖記憑後衞馬田卡沙利斯梅開二度，作客以2:1贏AC米蘭，今晚和波都可以出線，晉級形勢非常樂觀。「老婦人」早排陷入信心危機，連續4場不勝，好彩日前終於打破呢個心理關口，作客炒起費倫天拿5:0，中場派路仲狀態大勇，5個入波有4球都關佢事，今晚呢位指揮官倒戈AC，隨時又嚟料！


「老婦人」二線兵粒粒星


冇錯，「斑馬軍團」首回合作客AC係出副選，今晚次回合好大機會都係用正選夾二線兵應戰，不過大家咪忘記，所謂二線兵其實係講緊迪比亞路、波里路、基亞卓尼利呢批大將，當中迪比亞路賽前仲表明難得擔正，一定會做齣好戲幫祖記爭勝。


AC傷兵成籮賽程惡啃


對家AC嚟緊8日內要應付3場大戰，今晚意盃對祖記，周末意甲主場對羅馬，同埋歐聯8強首回合主場鬥巴塞，試問點可以場場搏盡？權衡輕重，重要性最低就係呢場波，難怪意大利傳媒都報道，雖然中場奇雲保定已傷愈復操，但會方決定唔出呢位加納國腳，等佢全力應付下周中對巴塞場歐聯大戰。




咪忘記AC仲有右閘阿比迪、前鋒柏圖、恩沙基、卡斯辛奴同中場法米尼打柴，就算加度素、施多夫同中堅尼斯達傷愈，對住矢志要成為雙冠王嘅祖記，分分鐘輸多鋪都唔奇。




首回合：祖客勝2:1

橫數千軍

 祖記31戰不敗

‧連意盃今季31戰未嘗1敗。

‧若今屆成功奪標，就會成為意盃史上首支10次封王球隊。

 AC米蘭旺開雙

‧近8戰6勝1和1負，對上7仗有6場開雙。

‧近6次交手獲2勝1和3負。