曼城征史篤城獻細

猪拉多纳

24/03/2012
文： 蘇豪

英超富豪球會曼城今輪作客中游分子史篤城，贏波即可重返榜首，鬥志唔使懷疑，但球隊聯賽客場表現曳得離譜，近八戰僅兩勝，近六仗只入兩球，毫無霸氣，今場頂盡小勝，博細盤！（有線200及300台周日凌晨1時30分直播）


曼城今季聯賽主、客場落差極大，上輪主場劣勢下反勝車路士，交出十五戰全勝完美靚績，惡到出汁！不過，曼城客場演出差好多，頭六戰五勝一和後，由去年十一月至今八戰僅贏兩場，近六戰加埋入得兩球，甚麼大衞施華、阿古路、巴洛迪利，億萬大軍環球巨星一旦離開主場統統腳軟，連爭取一個士哥都費盡九牛二虎之力，今戰難言穩勝。


曼城剛過去周中硬撼車路士搏得好盡，主帥文仙尼擁有龐大兵團，但實際用來用去都係嗰十三、四個人，球員唔係機械人，踢到季尾難免有疲態，要於客場踢出水銀瀉地進攻足球，可謂天方夜譚，文帥目標明確，但求碌入一球半球醜陋地贏波。射手泰維斯復出係最大變數，上場表現生猛，但憑佢一人之力實在難以幫球隊治愈作客病。

史篤城空襲被睇透

史篤城進攻模式單調，一味利用高空攻勢轟炸對手，靠中鋒高治、堅韋尼鍾斯、守將賀夫或梳爾哥斯死衝死撞，畀人睇通晒路，曼城後防硬淨，頂得住對手進襲。曼城近四次作客史篤城未贏過，四場同樣開出細盤，今戰客勝偏熱揀唔落手，曼城近六場作客聯賽全數開出細盤，再追多口啦！